Proposamen horrek plaza bera herriaren erdigunean "birika berde" bat bihurtzea planteatzen du, % 46,2ko lorategi- eta zuhaitz-eremuagaz. Gauzak horrela, eremuaren azalera berdea handituko dute, lorategi-eremuak jarrita, ibiltzeko eta egoteko guneakaz. Gainera, anfiteatro natural moduko bat jarriko dute, topaleku modura edo bestelako jardueretarako baliagarria izango dena, arduradunek azaldu dutenez. Era berean, inguruko irisgarritasuna hobetu, iturria eta pergola kendu, egoteko gune estali berri bi jarri eta umeentzako jolas-eremuan estaldura-azalera handi bat jarriko dute. Halaber, gune hori trafikotik babeste aldera, 25 aparkaleku kenduko dituzte.
Azaroan zehar aurkeztuko dute proposamen irabazle hori, Areetako Kale Nagusia kalea (Xake plazatik Santa Ana etorbiderainoko tartean) erdi-oinezko bilakatzeko proiektuagaz batera.
