Pandemiari aurre egiteko lehendakariaren azken dekretuan xedatutako neurriak betez, Getxoko Kultur Etxeak jakinarazi du gaurtik hasita, eta datorren urtarrilaren 28ra arte, bere jarduera garatzen duen barruko eremuen edukiera % 60 murriztuko dela; hau da: Romo eta Villamonteko kultur etxeak; Villamonte, San Nikolas eta Romoko liburutegiak; Muxikebarri Antzokia; Areetako Andres Isasi Musika Eskolako entzunaretoa; eta Algortako Biotz Alai plazako karpa.
Kultur etxeen kasuan, neurria eremu guztietan ezarriko da, erabilera anitzeko aretoak eta RKEko areto nagusia barne. Ikastaro eta tailerretarako aretoek ezin badituzte hartu izena eman duten pertsona guztiak, Kultur Etxeak edukiera handiagoko guneak bilatuko dituela iragarri du. Jarduera horien garapena errazte aldera, Kultur Etxeak, beharrezkotzat jotzen badu, areto-lagapenak bertan behera utziko ditu araua indarrean dagoen bitartean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
