Izadi motxiladun ume bilakatu dutela salatu dute Algortan

Ehunaka pertsona batu zen atzo, domekan, Algortan Izadi umearen egoera salatzeko. Hiru urte bete zituen atzo eta, ondorioz, espetxetik aterarazi dute, bere amarengandik aldenduz; Maria Lizarraga Aranjuezeko (Madril) kartzelan dago, baina egun gutxitan Zaballakora lekualdatuko dute. Iñigo Gutierrez aita, aldiz, barikuan irten zen espetxe horretatik, eta hirugarren graduan dago orain; halere, gaur, astelehenean, Zaballara joan beharko du bere egoera zein den argitzeko.

Atzo, domekan, jendetza bildu zen Algortan Maria Lizarraga (Burlata) eta Iñigo Gutierrez (Algorta) euskal presoen alaba den Izadiren egoera salatzeko. Haurrak hiru urte bete zituen atzo eta, hala, kartzelatik irtenarazi zuten. Aitak jaso zuen Madrilgo Aranjuezeko espetxearen atarian, hirugarren graduan baitago barikuaz geroztik; ama, aldiz, bertan segituko du egunotan, baina egun gutxitan Zaballako espetxera lekualdatuko dute.

Manifestazio batean, Algortako kaleak zeharkatu ondoren, Izadi Gurasoekin Etxera plataformako bozeramaileek nabarmendu zuten egondako lanaren ondorioz Gutierrez etxean: "Plataformatik eta norbanako askok aurrera eramandako lanari esker Iñigo Izadiren ondoan egon ahalko da eta Maria Euskal Herriko espetxe batera hurbilduko dute laster".

Halere, deitoratu zuten denak ez direla berri onak, Izadi amarengandik bananduko dutelako. Era berean, beste motxiladun umeak bezalaxe, salatu zuten Izadik ez duela jakingo noiz ikusi ahal izango duen berriro ama: "Hilean ordu gutxiz egon ahalko da berarekin".

Horren aurrean, aldarrikatu zutenez, "Izadi, gainerako motxiladun umeak bezala, bere gurasoekin egon behar da, etxean". Era berean, Maria Lizarraga ere eurakaz batera gura dutela azpimarratu zuten: "Maria ere gurekin nahi dugu, Izadirekin batera!". Gainera, haren ziega gutunez eta "elkartasun eta maitasun keinuez betetzeko" deia egin zuten.

"Iñigorekin ikusi dugu borondatea dagoenean posible dela soluzioak lortzea. Orain pilota Eusko Jaurlaritzaren teilatuan dago, Izadiren eta motxiladun ume guztien egoera gogor honi irtenbide bat emateko", ohartarazi zuten plataformako kideek, EAEko espetxeen kudeaketa Lakuaren eskutan dagoelako.

Gutierrez, hirugarren graduan

Izadiren aita, Iñigo Gutierrez, Aranjuezeko espetxetik irten zen barikuan, hilaren 21ean, hirugarren graduan. Halere, gertukoek jakinarazi dutenez, Zaballako espetxera joan beharko du gaur, astelehenean, hirugarren gradua zelakoa izango den argitzeko.

Erlazionatuak

Izadik gurasoakaz egon beharko lukeela aldarrikatzeko protesta egingo dute domekan

Getxo

Domekan, hilaren 23an, Iñigo Gutierrez (Algorta) eta Maria Lizarraga (Burlata) presoen alaba den Izadik hiru urte beteko ditu eta, ondorioz,...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun