Elkarrizketak

Irene Pera: "Igeriketa nire bizitzaren parte garrantzitsua da"

Algortako Fadura kiroldegian entrenatzen du ia egunero Irene Perak.

Getxo Sasoi Sasoian kirol galan, Promesa Onenaren saria eman zioten Getxo Igeriketa taldeko Irene Pera igerilariari, 2021eko Espainiako Txapelketako 200 metro libretan eta Udako Espainiako Txapelketako 100 metrotan lortutako brontzezko bi dominengatik. 15 urteko kirolari gazteak aitortu digunez, ez zuen aitortza espero, baina lausengatua sentitu zen bera aukeratu zutelako, "egindako ahaleginaren errekonozimendua da hori".

Zelakoak dira igeriketa-proben prestaketa-lanak?

Lehiaketa osoa prestatzen dugu, baina askotariko probak daude. Berbarako, Cadizen egindako azkenengo txapelketan bizkarreko 100 metro, estiloko 400 metro, 200 metro libre eta erreleboko bizkarreko 100 metro egin nituen. Eta noski, horietako bakoitzak prestaketa-mota bana behar du, beraz, denetarik entrenatu behar dugu; egunero gauza bat egiten dugu dena egin ahal izateko.

Horietatik guztietatik, zein da gehien gustuko duzuna?

Bizkarreko 100 metrokoa, hobekien daramadana da.

Eta gutxien?

Okerren ematen zaidan estiloa braza eta tximeleta dira, ez naiz oso ondo moldatzen horietan.

Hurrengo lehiaketak
Udako Espainiako Txapelketara begira dago orain Irene Pera; gainera, Bizkaiko Txapelketan marka onak lortu nahi ditu, baita Gijonekoan ere.

Noiz eta zergatik hasi zinen igeriketan?

Nire gurasoek behartuta; eskolan nengoela, igeriketa-ikastaroetan trebea nintzela ikusi eta Fadurara ekarri ninduten. Hasiera batean ez nuen nahi, negar egiten nuen ez nuelako entrenatu nahi, baina, azkenean, asko gustatzen zait mundu hau.

Etorkizunera begira, zeintzuk erronka dituzu buruan?

Europako Txapelketara joatea; horretarako, baina, markak egin behar ditut eta Espainiako Txapelketa bezalako lehiaketetara joan.

Zenbatean behin entrenatzen duzu astean?

Sei egun astean, eta bizpahiru alditan ere goizez etortzen naiz igerilekura.
Entrenamenduak eta ikasketak uztartzea erraza egiten zaizu? DBH 3. mailan nago, eta ez zait Batxilergoko jendeari adina kostatzen. 

Zer da zuretzako igeriketa?

Nire bizitzaren parte da. Errutina bat da: arratsalde guztietan entrenatzen dut, ia-ia beti. Egia da nire bizitza soziala murriztuta dagoela igeriketaren eraginez, baina ez dut alde batean utzi nahi, izugarri gustatzen zaidalako.

Non ikusten duzu zure burua urte batzuk barru?

Ez dakit, ez dut ezer buruan; momentuz Fadurako taldean jarraituko dut.

Erlazionatuak

Virginia Díaz arraunlaria izendatu dute 2021eko Getxoko kirolaririk onena

Getxo

Virginia Díaz arraunlariak 2021eko Getxoko kirolari onenaren saria jaso zuen atzo, martitzenean, Olatua itsas-bidaien terminalean egindako G...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun