Erasotuen testigantzak zalantzan jarri izana egotzi dio Algortako Mugimendu Feministak Getxoko Udalari

Erasoak salatzeko gaurko elkarretaratzea. Argazkia: Getxoko EH Bildu

Ehunka gizon-emakumek parte hartu dute gaur bart saninazioetan izandako ziztada bidezko erasoak salatzeko elkarretaratzean. Algortako Mugimendu Feministak deitu du mobilizazioa eta, horretan, Getxoko Udalaren jarrera deitoratu du, horrek kaleratutako oharrean erasotuen testigantzak “zalantzan” jarri izanagatik, ez Udaltzaingoak ezta Ertzaintzak ere salaketarik edo daturik ez dutelakoan.

Elkarretaratzean, feministek baieztatu dute bart “hainbat ziztaden” berri izan zutela, Algorta San Inazio jaien bigarren jardunaldian murgilduta zegoenean. Azaldu dutenez, hiru emakumek osasun-zerbitzuetara jo zuten ziztada bat nabaritu ondoren zorabio sentsazioa izan zutelako, eta, ordu batzuk geroago, gizon batek ere ziztada jaso izanaren abisua jaso zuten, txosna-gunean.

Mugimendu Feministarentzat, ziztaden teknika horrek emakumeak ditu jo puntuan, “gu eta gure gorputzak nahi dituzte erasotu. Eta hala ere, ziztatu ostean sumisio kimikorik gertatzen ez diren kasuak ere salatu nahi ditugu, emakumeok* beldurtu eta jai eremuak guretzako seguruak ez diren espazio bihurtzeko. Ziztada, beraz, droga eraso bat baino askoz gehiago da”.

Horrez gainera, Getxoko Udalaren jarrera deitoratu dute, “protokoloak berritu, erasoak salatzeko puntuak jarri, arreta-guneak bermatu eta herri mailako esku-hartze bat bideratu beharrean, Mugimendu Feministaren eskaerei eta proposamenei entzungor egin eta arduragabekeriaz” jokatu duelakoan.

“Ez dugu Getxoko Udalak zabaldutako oharra gure egiten”, azpimarratu dute. Izan ere, horrek zabaldu du ez Ertzaintzak ezta Udaltzaingoak ez dituztela daturik ezta salaketarik baieztatzeko mota horretako erasorik egon denik baieztatzeko, “erasotuen testigantzak eta hitza” kontutan hartu gabe.

Erlazionatuak

Bart atzemandako "ziztadak" salatzeko elkarretaratzea egingo dute gaur Algortan

Getxo

Bart, hainbat "ziztada" kasuren berri izan zuen Algortako Mugimendu Feministak. Hala, eraso horiek salatzeko asmoz, elkarretaratzea deitu dute gaur...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun