Hitzordu bikoitza izango da aste-akabukoa: lehenik, Jone Uria Donostiako Victoria Eugenia antzokian arituko da, Aitor Etxeberriazarraga, Beñat Iguaran, Eñaut Martikoena, Maddalen Arzallus eta Onintza Enbeita izango dituela aurrez aurre; kasu horretan, Leire Garatxena arituko da gai-emaile lanetan. Bestetik, domekan, Imanol Uriak txapelketa nagusian debutatuko du Lizarrako Los Llanos aretoan; oholtza gainean Aitor Bizkarra, Asier Azpiroz, Iñigo Mantzizidor Matxi, Maialen Akizu eta Unai Gaztelumendi izango ditu; aldiz, gai-jartzaile lanak egingo ditu Amaiur Lujanbiok.
Saio biak 17:00eta hasiko dira, eta Bertsozale Elkartekoek aditzera eman dutenez, Donostiako emanaldirako sarrerak aste hasieran amaitu ziren; hala ere, bertaratu ezin direnentzat www.eitb.eus eta www.bertsoa.eus atariek zuzenean eskainiko dute saioa 17:00etatik aurrera. Lizarrako bertso-saiorako sarrerak ere amaitzear daudela jakinarazi dute, baina 15:00etan irekiko dute Los Llanos aretoko txarteldegia azken tiketak eskuratzeko.
