Alkateak Geroa Ikastola zoriondu ondoren, nabarmendu zuen berarentzat beti dela pozgarria ikastetxe bat saritzea, etorkizuneko pertsonak formatzeko erantzukizuna dutelako eta ikastetxe honen kasuan gainera euskararen komunitatea indartzea helburu duen kolektibo bat saritzen delako. “Geroa Ikastola, Andra Mari auzoak auzolanean egindako ahalegin baten kronika da; belaunaldi berriei etorkizuna eskaintzea eta euskarari hasiera berri bat emateko asmoz egin zen esfortzu baten kontaketa. Denetarako balio duen hizkuntza bat nahi eta behar dugulako, ez liburuetan geratzen dena baizik eta kaleak apaltzen dituena. Eta hori eskaintzen jardun izan du gaur saritutako Geroa Ikastolak, fruituak zabaltzen, pertsonak formatzen, euskara kaleratzen, auzoa aberasten”, adierazi zuen atzoko galan, Agirre alkateak.
Loli Hernandez zuzendariak, ikastolaren izenean, eskerrak eman zituen, eta “geroatarren” komunitateari eman zion garrantzia, Geroa Ikastolaren aitzindariek, gurasoek, langileek, ikaslek eta ikasle ohiek osatuta. “Geroa Ikastola Andra Mari auzoak egindako ahaleginetik sortu zelako eta oraindik ere, Geroa auzoan oso errotuta dagoelako, auzoan euskara eta euskararen komunitatea indartzeko lanean”. 230 bat lagun hurbildu ziren atzo Argia Ereiten Euskara sariaren emate-ekitaldira, giro polita eta hunkigarria sortuz.
