PPk, EH Bilduk eta Elkarrekin Podemosek aurkeztutako osoko hiru zuzenketak eta tramitera onartutako 81 zatikako zuzenketak (PPren 15, EH Bilduren 33 eta Elkarrekin Podemosen 33) atzera bota zituzten, negoziazio-txanda akordiorik gabe amaitu ondoren. Ildo horretan, oposizioak kritikatu egin du Gobernuak negoziatzeko duen borondate eskasa eta aurrekontuak aztertzeko emandako epe laburra. Horren aurrean, EAJk eta PSE-EEk osatutako gobernu-taldeak baieztapen hori ukatu zuen, uste baitu "negoziatzeko borondatea alde guztietatik etorri behar dela, eta denbora laburra dela Gobernuarentzat ere, diru-sarrerak ezagutzeko zain egon behar duelako, eta abar".
Osoko zuzenketei buruzko azalpenean, oposizioak iritzi bera partekatu zuen: “Aurrekontuak ez diela erantzuten Getxoko egungo beharrei eta erronkei, ez duela planteamendu berririk, inbertsio gutxi jasotzen dituela eta iazkoa baino eskasagoa dela”.
PPk adierazi zuenez, “erakundeek diru gehiago bildu arren, familiak gaizki pasatzen ari dira; horregatik proposatu genuen zergak % 10 jaistea. Gainera, zerbitzu berdinak edo okerragoak ematen ari dira diru gehiago dagoenean. Inoizko aurrekonturik altuena da, eta inbertsiorik gutxien duena, ez baita % 9ra iristen”. Era berean, PPk galdetu zuen ea non geratzen den babesa merkataritzari, etxebizitzari, herritarren segurtasunari….
Bestalde, EH Bilduk adierazi zuen gobernu-taldeak, besteak beste, “eredu zaharkitu bat" proposatzen duela, bai aurrekontuen planteamenduan, bai HAPOren planteamenduan. "Planak aurreikusten dituen 4.000 etxebizitza baino gehiago ez dira eraikiko 20 urte baino lehen, eta gazteek Getxotik alde egiten jarraituko dute. Gainera, ez zaie gizarte, kultura eta kirol eragileei laguntzen, elkarteei ematen zaizkien diru-laguntzak izoztu egiten baitira, ez dio aurre egiten udal ondarearen galerari eta ez du ingurumen fisikoaren aldeko apusturik egiten”.
EH Bilduk aurkeztu zituen zuzenketa partzialen bidez egindako proposamenen artean, honako hauek zeuden: “Etxebizitzak alokatzeko diru-laguntzak handitzea eta Etxebizitzaren Udal Institutua sortzea; Berdintasun Arloa birdimentsionatzea, haren aurrekontua handitzea eta ildo horretan lan egiten duten kolektiboei diru-laguntzak ematea; merkataritzari laguntzeko berezko aplikazioa (app bat), hutsik dauden lonjak mobilizatzea, tokiko merkatuei laguntzea eta merkataritza biziberritzeko plan berezi bat, Getxo bus eta rokodromo bat”.
Elkarrekin Podemosek ere bat egiten zuen EH Bildugaz aurrekontu horiek errefusatzeko argudioetako batzuekaz, “ondarearen galerari, etxebizitza ekonomikoen politika ez-eraginkorrari, HAPO inbaditzaile bati eta herritarrei, eragile sozialei, kulturalei eta oposizioko alderdiei entzun gabe. Aurrekontu kontinuistak dira eta ez dira 2023ra egokitzen. Ez dira ditugun diru-sarrerak aprobetxatzen, ez da txoke-planik aurreikusten pertsonei, negozioei… mesede egiteko”.
Talde horrek, bere zuzenketa partzialetan, honakoak proposatu zituen: “Udal Erakunde Autonomoetan hobekuntzak egitea; familientzako lana bateragarri egiteko espazio gehiago eta Haurreskola gehiago; bazterkeria-egoeran dauden pertsonentzako aterpetxe berri bat; nahi ez den bakardadearentzako plan estrategiko bat; etxebizitzaren behatoki bat; berdeguneen babesa plan bereziekin; Getxo busa; autokarabanentzako aparkaleku bat; aldagailu inklusiboak eta berdintasun arloa indartzea”, besteak beste.
Osoko zuzenketei emandako erantzunean, gobernu-taldeak nabarmendu zuen aurrekontu kontinuistak direla, "jakina, lau urteko legegintzaldi Plan batetik datozelako. 2023a zubi-ariketa bat da plan honen eta datorren urteko hauteskundeen ondoren datorrenaren artean. Izaera sozial eta inbertitzaile argia dute, eta hiru agendaren arteko orekan oinarritzen dira: soziala, ingurumenekoa eta ekonomikoa. Horiek funtsezko zutabeak dira Giza Garapen Iraunkorrerako. Tasa eta zergak igo beharrik gabe, inflazioaren ondoriozko gastu arruntaren hazkundea xurgatzea lortzen du. Aurrekontu proposamen zuhurra da, inflazioaren eta ziurgabetasun ekonomikoaren ondorioak indargabetzen dituena”.
Proiektuak
Udal-gobernuak adierazi zuen 2023ko aurrekontu horrek aurrera egiten duela Legealdi Planean jasotako hainbat proiektutan, hala nola:
- HAPO-Hiri Antolamenduko Plan Orokor berria, "Getxoko ingurumena babesteko erabakitasun politiko sendotik sortu dena".
- Areetako Xake plazaren diseinu berria.
- Mugikortasun iraunkorraren aldeko apustua: bidegorrien sarea eta TAO Espresa.
- Etxebizitza Plan berria (2020-2035), hainbat premia asetzeko irtenbideak eskainiko dituena, etxebizitzen ondare publikoa areagotzean eta alokairu sozialaren aldeko apustuan oinarrituta.
- Gizarte Zerbitzuen bultzada berria, honako erronka hauei arrakastaz aurre egin ahal izateko: biztanleriaren zahartzea, familia-aldaketak, berdintasuna eta aniztasunaren benetako inklusioa.
- Haur eta gazteentzako aisialdirako guneak hobetzea: Areneko parke estali berria eta Algortako Gaztelekua hobetzea.
- Herritarrentzako arretarako leihatila bakarra bultzatzea.
- Hondakinak eta energia berriztagarriak kudeatzeko estrategia berria, ekonomia zirkularreko ekimenak sustatuko dituena eta aurreztea bultzatuko duena.
Halaber, EAJk eta PSE-EEk azpimarratu zutenez, “2022an hedatutako politika publikoak sendotzen ditugu, herritarrek aukeratutako 5 kultura-, kirol- eta aisialdi-proiektu gehituz; energia-eraginkortasuna hobetuz kontsumoak murrizteko, mugikortasun jasangarrian, espazio publikoen kalitatean eta eraikin publikoetan herritarren gozamenerako, hala nola, Emakumeen Etxea, Tangorako Gaztelekua, adinekoentzako tutoretzapeko apartamentuak, Algortako eta Romoko gizarte-zerbitzuak edo Ikastetxeetan egindako inbertsio garrantzitsuak”.
Gobernu-taldeak gogorarazi zuen Legegintzaldi Planaren % 85 bete dutela, eta zuzenketa partzialei dagokienez, adierazi zuen: “aurkeztutako proposamen batzuekin bat datorren arren, lehenetsi behar da, eta baliabideak ez dira amaigabeak. Beste batzuekin ez gaude batere ados, adibidez, PPk fiskalitatearen arloan aurkeztutakoekin edo zenbateko oso handiak dituztelako gauzatzeko zailak direnekin; eta beste batzuk dagoeneko exekutatzen ari dira edo etorkizunean ekingo zaie”.
