Aurreko astean egin duten bezala, gaurkoan ere Lope de Vega kaleko 12 zenbakiko eraikinak eraistearen kontrako protesta egin dute hainbat auzokidek Itzubaltzeta/Romon. Goizeko 07:30ean batu dira hainbat gizon-emakume Santa Eugenia plazan, eta, ondoren, Gobelaurre kalera gerturatu dira, Bizkaiko Foru Aldundiak bidalitako enpresako langileak, makinak eta kamioiak eraikinetarako sarbidea oztopatzeko eta euren aldarrikapenak zabaltzeko.
Paco Rama Ibar Nagusien Etxea elkarteko presidenteak iragarri duenez, protestan jarraituko dute eraikinak guztiz botata dauden arte. Bide berean, Joseba Lekunberri eraikinon eraistearen kontrako Romo Plataformako kideak azpimarratu du euren asmoa borrokan jarraitzea dela era, eta jakinarazi du arrastiko 19:00etako elkarretaratzearen ondoren datozen egunotarako bide-orria osatuko dutela auzokideen artean.
Lope de Vega kaleko eraikinak eraistearen kontrako protestan hainbat herritar identifikatzen ari da Ertzaintza, tartean @HirukaEus kazetaria bere lana egiteagatik. pic.twitter.com/Iz70c00Dl0
— Hiruka (@HirukaEus) February 21, 2023
Gaur, martitzenean, Ertzaintza Lope de Vega kale osoa moztu du, eta agenteak inguruak zelatatzen aritu dira, baita protestan aritu direnak disolbatzen saiatu ere, beharginen sarbidea bermatzeko asmoz. Hala, goizeko 08:00ak aldera, Gobelaurre eta Lope de Vega kaleko bidegurutzean, dozenaka ekintzailek errepidea oztopatu dute, zebrabidean jarrita, zutik eta geldi. Ekintzaileek ez dute erresistentziarik jarri, eta, bultzaka bada ere, ertzainek langileei bidea zabaldu diete.
Jarraian, zebrabidea igarotzen ari zen pertsona bat hartu eta atxilotuta eraman dute poliziek, baita beste bat identifikatu ere, agintaritzaren aurkako atentatua. Une horretan, auzokideek atxiloketa galarazten saiatu dira, eta tentsio-uneak bizi izan dira alde bien artean; ertzainak borra-kolpeka hasi dira auzokideen kontra, atxilotua kotxera eroan ahal izateko.
❌La Ertzaintza golpea a lxs vecinas que se oponen al derribo de la Nagusien Etxea, hay un detenido. pic.twitter.com/NU4UaBu8Lb
— Alerta Gorria Irratia (@AlertaIrratia) February 21, 2023
Ordu erdi beranduago, 08:30ean, obra-hondakinak jasotzeko kamioiaren sarrera oztopatzen ari zirela, ertzainek beste pertsona bat atxiki eta identifikatu du, protesta egiteagatik. Auzokideek jakinarazi dutenez, azken auzokide horri salaketa jarriko omen diote, poliziak iraintzea egotzita.
Protesta amaituta, HIRUKAko kazetaria lekutik alde egiten ari zela, poliziek hura atxiki, geldiarazi, identifikazioa eskatu eta mugikorra ez erabiltzeko ohartarazi diote. Une horretan, bultzaka, prentsa-karnetak balio ez zuelakoan, NAN-a ateratzeko eskatu diote, eta halaxe egin du.
