Algortako trinitarioetako Benigno Zaballak adierazi duenez, gaurko sinadura-bilketa honegaz lortu gura dute herriak jakitea Udalak eskuartean zer duen gure elizari dagokionez: "Parrokiako eta Argia Fundazioko eremuko lekuetan hainbat etxe egin nahi dituzte, eta zaintzen ditugun gaixoak San Martin eskolara lekualdatu. Gure ikuspuntutik hori onartezina da, eta horregatik gaude borrokan".
Gainera, Zaballak azpimarratu du Udalak ez duela haien hitza kontuan hartu. "Bildu ginenean, Getxoko alkateak esan zidan jada plana Udalean onartuta zegoela, gure iritzia kontuan hartu gabe. Haiek argudiatu zuten plan hau herriaren onerako zela". Bestalde, Algortako trinitarioak gogor salatu du HAPOaren atzean Udalak dituen interesak: "Argi dagoena da eurek nahi dutena egingo dutela: etxeak egin, kobratu eta hor konpon besteon iritzia".
Gaurko sinadura-bilketara jende andana hurbildu dela ere adierazi du Zaballak: "Tantaka-tantaka etorri da jendea sinatzera, izan ere, gehienek ez zekiten ezer ez. Horregatik, domeketan, elizan, informazioa zabaltzeaz arduratzen gara".
