Bi urtez lan-baldintza duinak aldarrikatzen aritu eta gero, apirilaren 4an, martitzenean, Getxoko kale-garbitzaileak eta hondakin-biltzaileak PreZero enpresagaz bildu ziren lehenengo negoziaketei ekiteko. Hala, garbitzaileen langile-batzordeko ordezkari den Alexander Bilbaoren esanetan, enpresagaz aurreakordio bat adosteko gertu daude egunotan.
Alexander Bilbaok azaldu duenaren arabera, azken egun hauetan langile-batzordeko bileran bozkatuko dute enpresagaz adostutako hitzarmen berria onartuko duten ala ez; hala ere, "seguruenik" aurre-akordioa aurrera aterako dela iragarri du. Modu horretan, haien eskariaren zati bat beteko lukete: "Soldaten igoerak bermatu dizkigute, baita oraingo langileen iraunkortasuna ere".
Bestalde, tokiko zaborra biltzeko eta kaleko garbiketa-zerbitzua esleitzeko emakidaren eztabaida kendu zuen gobernu-taldeak (EAJ eta PSE-EE) joan den martxoaren 30eko osoko-bilkurako gai-ordenetik, "garbiketa zerbitzuko langileen eta enpresaren arteko negoziazioa ez oztopatzeko". Hala, oraindino ez dute zehaztu noiz jorratuko duten gaia berriro ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
