Aurten, ekainaren 6, 7 eta 8an izaten ari dira selektibitateko azterketak, eta, Lago "antsietatez beteta" sentitzen dela aitortzen du, izan ere, ez daki gai izango den gura duen graduan sartzeko behar besteko nota eskuratzeko. Ikasle gisa, argi du ez duela bat egiten selektibitatea bezalako hautaproba bategaz: "Norgehiagokan ibiltzera kondenatzen gaituen proba bat da, antsietatez betetzen ditu gure bizitzak eta indibidualismo hutsera bideratzen gaitu une oro".
Horregatik, beste bide batzuk beharrezkoak direla ikusten du: "Selektibitatearen ordez, lan baten aurkezpena proposatuko nuke edota Batxilergoko notaren batez bestekoa soilik kontuan hartzea. Ikasleon arteko lehiakortasuna eta indibidualismoa ezabatuko dituen sistema bat behar dugu". Bestalde, bere kurtsoko irakasleek denbora faltagatik gai guztiak presaka irakatsi behar izaten dituztela deitoratu du: "Ez zigunez denborarik ematen ikasgai-zerrendako zati bat kurtsoa bukatzean eman genuen. Izan ere, selektibitatea prestatzeko errepaso-klaseak egin genituen, modu horretan, irakasleen laguntzaz proba ahal bezain ondo prestatu ahal izateko".
Hori dela eta, ezinbesteko ikusten du hezkuntza sistemak "ikasleen benetako beharrak eta iritziak kontuan hartzea".