Bekari esker, hango edozein unibertsitate hautatzeko aukera izan zuen, eta azkenean Fukuoka aukeratu zuen, herrialdearen hegoaldean, Kyushu uhartean, "bertan ikertu gura nuenetik hurbil zegoena ikertzen ari zen irakasle bat aurkitu nuelako". Gaur egun, Australiako startup batentzat egiten du lan, urrutiko lanean, ingeniari gisa; "itsuentzako betaurrekoak garatzen ari gara, inguruan zer dagoen jakiten laguntzeko".
Dioenez, Japoniak berezitasun asko ditu kulturari dagokionez, eta horrek egokitzapena zaildu dezake, "baina ohitzen zarenean, bizitza nahiko erosoa da". Janaria ere oso ezberdina dela dio, eta sushia eta ramena bezalakoez gainera, Fukuokan motsunabea eta mentaikoa dute, besteak beste. Hala ere, arroza, miso zopa, barazkiak eta arraina zein barazkia jaten da batez ere. Orokorrean, dena garestiagoa da, fruta batez ere: "Sagar batek euro bat baino gehiago balio du". Edariari dagokionez, garagardoaz gainera, sake edo sochua edaten dute.
Fukuoka hiri atsegina da, handia izanik Tokioko jendetzarik ez duena. Hala ere, aitortzen du ez dagoela leku askorik bisitatzeko eta turista gehienek Kioto edo Tokio hirietara jotzen dutela. Hala ere, yatai janari-postuak bisitatzeko gomendatu digu, "Japonian nahiko arraroak dira-eta". Era berean, azaldu du garrantzia historiko handirik ez duen arren, Nagasaki eta Hiroshimatik gertu dagoela, eta, hasieran, amerikarrek Kokurako portua bonbardatu gura zutela, Fukuokatik gertu, "baina baldintza klimatiko txarrak zirela-eta, Nagasakin bota zuten bonba nuklearra.