Ertzaintzak gizon bat atxilotu zuen domekan Algortan, tokiko jaietan adingabe bati sexu-erasoa egitea egotzita, Eusko Jaurlaritzako Segurtasun Sailak jakitera eman duenez. Polizia autonomikoa adingabeak jarritako salaketa ikertzen ari da eta ustezko egilea epailearen esku utziko du datozen orduetan Ertzaintzak.
Getxoko Algorta jaietan ustez domeka goizaldean izandako sexu-erasoagatik adingabe batek jarritako salaketa ikertzen ari da Ertzaintza. Ustezko egileak, adin nagusikoa bera, Getxoko polizia-etxean dago oraindino, epailearen esku geratzeko zain.
Bestalde, Ertzaintzak HIRUKAri baieztatu dio zapatuan beste eraso matxista bat egon zela Algortan; kasu horretan, emakumeak salaketa Getxoko Udaltzaingoaren komisarian jarri zuen, eta oraindino ez dago bestelako informaziorik horri lotuta.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
