50.000 gida banatuko dituzte, etxebizitzetan, liburutegietan, kiroldegietan, Ertzain-etxean, Udaltzaingoaren egoitzan, HABetan eta beste hainbat tokitan. "Indarkeria matxista emakumeen eta gizonen arteko desberdintasunaren adierazpen handiena da. Gizartean errotuta dagoen egiturazko indarkeria da, era askotakoa izan daitekeena (psikologikoa, fisikoa, sexuala, ekonomikoa, bikarioa, soziala...). Herritarren eskura jarriko dugun gida honen helburua da emakume izateagatik aurre egin behar diegun indarkeria motak biltzea baita euskal erakundeek arreta emateko dituzten baliabide nagusiak ere indarkeria matxista jasaten edo jasan duten emakumeak artatzeko", nabarmendu du Carmen Diazek, Gizarte Kohesioko zinegotziak.
Bestalde, Udaleko Bozeramaleen Batzordeak Adierazpen Instituzional bat (testu osoa, hemen) onartu du, aho batez, besteak beste, hurrengo konpromisoakaz: indarkeria matxista prebenitzeko tokiko estrategia eratzea, hobetzea eta indartzea, adingabeen artean sexu-indarkeriari aurre egiteko egiturak, baliabideak, zerbitzuak edo programak ezarriz; biktima adingabeen inguruan sexu-indarkerien antzematea eta arreta goiztiarra gaitzea eta hobetzea, tokiko koordinazio-protokoloen bidez, eta sentsibilizazio-programak diseinatzea, garatzea eta hobetzea herritarrakaz, eta bereziki gurasoakaz eta irakasleakaz, IGEen bitartez, genero-ikuspegidun kalitatezko sexu-hezkuntzaren beharrari buruzkoak.
Bestalde, aste honetan puntu morea duten pankartak jarri dituzte udalerriko eraikin berezietan, horien artean, udaletxean, Santa Claran eta Bizkaia Zubian, eta argiztapen morea jarriko dute Moilako pasealekuan eta hainbat igogailu publikotan. Ildo horretan, Udalak emakumeen aurkako indarkeria gaitzesteko jarreraren sinbolo eta adierazle aktibo gisa den puntu morea jartzera animatu du, "horren jatorria emakumeen eta gizonen arteko desberdintasunean baitago". Horretarako, Berdintasun Zerbitzuak binilozko puntu lilak argitaratu ditu eta horiek Berdintasun Zerbitzuan jaso daitezke, Algortako Urgull kaleko udal-eraikinaren bigarren solairua. Puntu hori duten txapak eta txarteldegiak, Romo Kultur Etxeko, Villamonteko eta San Nikolaseko liburutegietan daude eskuragarri.
Udalerriko eragileen ekintzak
Azkenik, Beldur Barik proiektuaren barruan, Europa eta Azkorri ikastetxeetako 14 eta 17 urte bitarteko gazteek grafiti more bat egin dute, eta berdintasunaren eta indarkeria matxistaren kontzeptuei buruzko hausnarketa-prozesu batean parte hartu dute. Era berean, aste honetan zehar Kukupraka Ludotekak A25aren inguruko ekintzak garatuko ditu, egunaren, kolore morearen eta indarkeria matxistari lotutako kontzeptuak ulertzeko.
Udalerriko entitateek antolatutako jardueren artean, Gizatiar, Romo-Areetako emakumeen gizarte eta kultura elkarteak hainbat jarduera antolatu ditu (solasaldiak, antzerkia, …) eta hilaren 25ean, bere ohiko kontzentrazioa egingo du Bizkaia Zubia plazako puntu lilan, 19:30ean, besteak beste.