Algortako Merklin Organoaren Lagunen Elkarteko presidenteak, Pedro Guallarrek, adierazi duenez, ekimen honen helburua da Eguberrietako egun horiek aprobetxatzea, "aldarrikatzeko San Nikolas Barikoa parrokiako organoaren kalitatea eta eskaintzen dituen aukera ugariak. Programa askotarikoa eta kalitatezkoa izango da eta ospe handiko interpreteen esku egongo da”.
Lehenengo emanaldian, barikuan, hilak 22, Peio Irigoien txistulariak eta Iñaki Arakistain organistak joko dute. Bihodi Proiektuaren bultzatzaileak dira biak eta horren bitartez, tradizioa eta modernitatea uztartuz, musikarekiko grina transmititu gura dute, "publikoari errepertorio zabala eta zaindua eskainiz".
Eguaztenean, hilak 27, arituko da Andrada anaiek osatutako bikoteak; Xabierrek (biolina) eta Andonik (organoa), "gazteak izan arren, daborduko ibilbide musikal garrantzitsua dute", azaldu dute antolatzaileek.
Eguenean, urtarrilak 4, itxiko dute zikloa Bilboko Coro Ars Viva Abesbatzak, Yolanda Quincocesek zuzenduta, eta Pedro Guallar organistak.
Algortako Merklin organoa
1908an eraiki zuten, Parisko Manufacturas de Grandes Organos J.Merklin & Cie tailerretan, Algortako San Nikolas Barikoa elizarako. Garai hartan 28.500 pezetako kostua izan zuen, Jose Antonio de Uriarte y Sustachak ordaindu zuena. 2019an, parrokiako eliztar talde baten eta Getxoko Udalaren bultzadari esker, Alejandro Turanzas organo-maisuak zaharberritu zuen. Estilo erromantikoa du, haritzezko egurrez egina dago eta barruan 1.500 hodi baino gehiago ditu eztainuzko eta berunezko aleazioan eraikiak. 56 notatik gorako eskuzko bi teklatu eta 30 notako pedalier bat ditu. Barruan hiru hauspo ditu, animalia-larruzkoak, konponketa horretan erabat berritu direnak, bai eta elikatzen dituen haizagailu elektriko isila ere.