Getxoko kaleak inbadituko ditu Ibilaldiak maiatzaren 26an, musika, dantza, kolore eta tradiziozko uholde urdin bategaz. Aurten, Bizkaiko ikastolen jaiak lau gune izango ditu, "publiko guztiarentzat esperientzia paregabea eta anitza sortuz", azpimarratu dute Unai Arzubiaga San Nikolaseko presidenteak eta Gaizka Arrizabalaga ikastetxeko zuzendariak.
Antolatzaileek azaldu dutenez, egitarau "inklusiboa eta parte-hartzailea" osatu dute, publiko guztiari zuzendutakoa. "Hasieratik, adinaren araberako segmentazioa saihestuko duen esperientzia inklusibo bat sortu nahi izan da, gune guztietan haur, gazte eta nagusientzako jarduerak eskainiz".
1.gunea San Nikolas Ikastola - Ibilaldiaren bihotza
Ibilaldiaren bihotza San Nikolas Ikastolan dago, bertan jaio baitzen duela 30 urte baino gehiago. Ikastolak historia aberatsa eta euskal kulturarekiko konpromisoa ditu, eta Ibilaldiaren muina izango da. Gune horretan emango diote hasiera egunari. Hasiera ekitaldian, bertako ikas-komunitateaz aparte, inguruko agintariak eta beste ikastoletako ordezkariak izango dira gonbidatu gisa. "Ikastolan hasi eta herrira luzatuko dugu jaia".
Ikastola gunean egun osoan zehar tradizioak bat egingo dute modernitateagaz, eta euskal musika eta dantza ikuskizunez gain, Haur Hezkuntzako Topaketez, Herri bazkariaz eta askoz gehiagoz gozatzeko gune bat izango da.
Egitaraua
- 11:00-13:00 Erronka
- 11:00-12:00 Itxartu dantza-taldea
- 11:00-13:00 Topaketa HH
- 12:30-13:30 Tor Magoa
- 13:00-14:00 Zurrumurruen aurkako ipuin-kontaketa
- 13:30-14:30 Kadira
- 13:30-15:00 Aurpegi margoztu eskulanak
- 14:00-15:00 Herri-bazkaria
- 15:00-16:00 Bertsolariak
- 16:30-17:30 Yogurinha
- 17:30-19:00 DJ Kaktus
Klima aldaketa tailerra eta puzgarriak.
2. gunea San Nikolas plaza eta inguruak - Herriko kulturarekin topaketa
San Nikolas plaza eta inguruak agertoki bihurtuko dira Ibilaldiaren egunean. Gune honetan, bisitariek kontzertuak, kalejirak, antzerki emanaldiak eta artisautza erakusketak izango dituzte. San Nikolas plazak garrantzi berezia du ikas-komunitatearentzako, plaza hau baita elkartoki urte osoan zehar, bai familientzako eta baita ekitaldiak burutzeko ere. "Getxoko kulturan eta tradizioetan murgiltzeko topagune ezin hobea izango da", azpimarratu dute.
Egitaraua
- 11:00-12:00 Kimetz eta Biotz Alai
- 11:00-13:00 Topaketa LH 5-6
- 11:00-13:00 Erronka DBH 3-4
- 12:30-13:30 Zasi Eskola eta Agurra dantza-taldea
- 13:00-15:00 Herri kirolak
- 13:30-15:30 Haszten
- 14:00-15:00 Kontzertua: Zuriketan Beltz
- 15:30-19:00 Tailerrak Eskubeltz eskaut taldea
- 15:30-17:00 Itxas Argia dantza-taldea
- 18:00-19:00 Kontzertua: Bele
Puzgarriak eta azoka.
3.gunea Algortako Portu Zaharra - Itsasoari eta tradizioari omenaldia
Algortako Portu Zaharrak, bere marinel xarma eta historia aberatsagaz, Ibilaldiaren 3. gunea hartuko du. "Gune paregabe honetan, bertaratuko direnek mota ezberdinetako ekintza eta ikuskizunez gozatu ahal izango dute", iragarri dute. Gazteek euskal musika taldeak zuzenean ikusteko aukera izango dute.
Egitaraua
- 11:00-12:00 DJ Muxutritzzzz
- 11:00-13:00 Topaketa LH 1-2
- 12:30-13:30 Kontzertua: Nazka
- 13:00-15:00 Zirku tailerra
- 14:00-15:00 Kontzertua: Itziarren Semeak
- 15:30-17:00 Kontzertua: Xiberoots
- 17:00-19:00 DJ Bull
Suhiltzaileak, Euskaltel Txirrindularitza tailerra.
4.gunea Ereagako hondartza - Herriguneko hondartza
Ereagako hondartzan familia guztientzako ekintzak eskainiko dituzte. Hondartza honek 800 metroko luzera izanik, aisialdirako eta gozamenerako Getxoko leku enblematikoa da, eta agertoki ezin hobea izango da Ibilaldiaren bizitasuna eta alaitasuna ospatzeko.
Egitaraua
- 11:00-11:30 Estitxu Robles
- 11:00-13:00 Topaketa LH 3-4
- 12:00-13:30 Zunba
- 13:00-16:00 Egurrezko jolasak
- 14:00-15:00 Kiki, Koko eta Moko pailazoak
- 15:30-16:30 Goazen
- 16:30-17:00 Bits festa
- 17:00-19:00 Bidean erromeria
Zientzia eta jasangarritasuna gunea, Euskrania eta Atfal (Sahara), egun osoan.
