Udari ongi etorria emateko aurpegi margoketa egin zuen Eskubeltz taldeak; Pagkakaisa, Pro Bolivia eta Sikapek dantzak egin zituzten eta magia ikuskizuna ere egon zen Andoni Magoaren eskutik. Gainera, ALBEtik bertso-saioa antolatu zuten June Diaz, Maialen Lago eta Peio Lagogaz. Halaber, mokadu bat jateko unea egon zen, Abian Kultur Elkarteak, Getxoko Etorkinak Federazioak eta San Nikolas Zabalik prestatutako txokolate jana eta munduko postreakaz. Magia gehiago gehitzeko konjurua ere egin zuten Urdiango San Juan kantaitak eta Itxartu Dantza taldeak, azkenean, sua piztu zuten arte. Bertan, dantzan ibili ziren Txondorra eta Koroa Biluzik elkarteak.