Itaiako kideek gogoratu dute egungo jai-giroa ez dagoela gizarte-eredutik salbuetsita, eta bertan ere jarrera matxistak eta erasoak erreproduzitzen direla. "Jai-eredu kapitalista egunerokotasunetik ihes egiteko bitarteko moduan ulertzen da eta testuingurua sortzen du biolentziaren areagotzerako. Biolentziaren areagotze horrek sektore zapalduenetan eragiten du; horren adibide dira emakume langileon kontrako erasoak", deitoratu dute.
Hori dela eta, "ezinbestekotzat jo dute langileak modu independentean antolatzea, "indarkeria matxista gainditzen lagunduko duten baliabideak martxan jarriz, emakume langileon zapalkuntzarekin amaitzeko".
Asmo horregaz, Itaiak eraso matxistei aurre egiteko protokoloa martxan jarri du gaur Aixerrotan ospatzen ari diren Nazioarteko Paella Lehiaketaren festarako. Hala, eraso baten biktima edo lekuko direnek Bronxeko iturri parean egongo den babesgunera jo dezakete edo 604 251 349 telefono-zenbakira deitu. Baliabide horien bidez protokoloa aktibatuko dute, behar duenari babes soziala, aholkularitza, salaketa publikorako bitartekoak zein uneko eta ondorengo laguntza eskaintzeko.
