Partaidetza-prozesua irailaren 5etik 15era egin da, eta 726 parte-hartzaileren botoa jaso da horretan. Zeugaz plataformaren bidez eta aurrez aurre Romo Kultur Etxean, Villamonteko kultur etxean eta Getxo Elkartegian euren proiektu gogokoena hautatzeko aukera izan dute herritarrek.
Boto gehien jaso duen proposamena Giorgos Gkareth Christouren lana da eta Auzotarren mosaikoa du izenburua. Lan horren bidez, artistak plazako erreferente ezagunak indartu gura izan ditu, eta horretarako collage analogikoa erabiltzen du. Horrek auzoan zehar paseatzea proposatzen du, elementu arkitektoniko eta natural desberdinen eskutik, baita eguneroko eszenak erakutsi ere, betiere sakontasunagaz eta altueragaz jolastuz.
Proiektuak 235 boto jaso ditu eta, horren atzetik, honako proposamen hauek geratu dira: Aaron Diego Escauriazaren Ajedrez (187 boto), Amaia Arrazola Otaduyren La mirada de Miren (172 boto), Luis Olaso Garraldaren Cuatro estaciones (77 boto) eta Jose Ramon Bañalesen Urban jake (55 boto). Bost lan horiek lehiaketako epaimahaiak aukeratu zituen finalista izateko, lehiaketara aurkeztutako 33 proposamenetatik.
Irabazlea aukeratzeko azken pausoak
Miren Larrea muralismo-lehiaketako epaimahaia urrian bildu ondoren, aukeratutako proposamenaren egile den artistagaz adostuko du kontratua Kultur Etxeak. Behin proiektua hasita, artistak lau hilabete izango ditu hori amaitzeko. Obra herritarrengana hurbiltzeko, egileak bitartekaritza-prozesu bat egin beharko du, eta Getxo Kulturak horren berri emango du unean-unean. Epaimahaia honako hauek osatuko dute: Getxo Kulturako zuzendaritzak, erakundeko bi teknikarik, fatxadaren jabe titularraren jabeen erkidegoko ordezkari batek eta Antzezaleak eta Garrobi tokiko talde artistikoek izendatutako bi sortzailek.
