Getxoko Udalak gaur iragarri duenez, urriaren 18an ezohiko batzordea deituko du "Irurak Bat" eraikinaren eraisketari lotuta, EH Bilduk eta Elkarrekin Podemosek eskatuta. Hala ere, bi alderdiok salatu dute gobernu-taldea (EAJ eta PSE-EE) "legezko amarruak" erabiltzen ari dela, "ohituta gaituztenak, kooperatibisten eta alkatearen agerraldiak saihesteko. Borrokatu behar dugun legeria maltzur erabiltzen ari dira. Eskura ditugun baliabide guztiak jarriko ditugu gertakari horiek eta hirigintzako egoera argitzeko".
EH Bilduren eta Elkarrekin Podemosen ustez, erabaki horrek agerian uzten du gobernu-taldearen "gardentasun falta eta eraisteko prozeduran gertatutakoa argitzeko borondate eza". Oposizioko kideen arabera, EAJk eta PSE-EEk legeak ezarritakora mugatu dira soilik, "gobernu-taldeak deialdia egin behar izan baitu, batzordeko kideen % 25ek baino gehiagok eskatuta".
Egoera horren aurrean, EH Bilduk eta Elkarrekin Podemosek gobernu-taldeari eskatu diote auzian inplikatutako zinegotzi guztiek, baita alkateak ere, "salbuespenik gabe" erantzun dezatela, oztopoak jartzeari utz diezaiotela eta eraikinaren eraispen irregularrari buruzko informazio guztia eman dezatela.
