Belarriprest eta ahobiziek, gutxienez aste eta erdian, lehen berbak euskaraz egiteko ahalegina egingo dute; eta elkarrizketa elebidunak ugarituko dira. Belarriprestak eroso esango dio parean duenari beragaz euskaraz berba egiteko, eta ahal duen guztietan berak ere euskaraz egingo du. "Txapa jantzita ibiliko gara 11 egunetan, kalean, lanean eta aisialdian euskaraz erosoago aritzeko", azaldu dute ekimenaren antolatzaileek.
Euskaraldia hasi dela ospatzeko, beraz, hamaika ekitaldi antolatu dira Euskal Herriko txoko askotan: guztietan irakurriko da testu bateratu bat, eta denek batera jarriko dute Euskaraldiko txapa eguenean, 19:00etan. Hortik aurrera, dantza, musika eta ikuskizunak izango dira herriz herri.
Hasiera-ekitaldi handiak hiriburuetan izango dira, baina baita Getxon ere, Gure Zirkuko karpan. Hona hemen egun horretarako egitaraua:
- 17:30 Kalejira Musikaliagaz.
- 18:00 Ekitaldiaren hasiera:
- ALBEko bertsolariak “Balkoitik balkoira” eran.
- Aurkezlearen ongi etorria eta ekitaldiaren aurkezpena.
- Euskaraldiaren barruan Getxon hilabeteotan egindakoaren laburpen-bideoa.
- Rolen azalpena Getxoko Ahobizi baten, Belarriprest baten eta Irribizi baten eskutik.
- Gure Zirkukoen emanaldia.
- Getxoko Hamaikakoaren aurkezpena.
- Manifestuaren aurkezpena, irakurketa.
- Txapa jartze kolektiboa eta argazkia.
- 18:55 Musikalia bandak aurtengo abestia joko du.
- 19:00 Amaiera.
