Aurten ere, Getxoko Udalak gune morea ahalbidetuko du sanisidroetan indarkeria matxistaren biktimentzat, arreta eta aholkularitza jasotzeko. Arreta ematen egongo diren emakumeak dauden baliabideak ezagutzen dituzten profesionalak dira, eta aste-akabu osoan egongo dira, barikuan, 23:00etatik goizaldeko 05:00ak arte, kiroldegiko kanpoaldean; eta zapatuan, 21:00etatik 23:30era, Malakaten, eta 05:00ak arte, kiroldegiaren kanpoaldean.
Gune morean, erasoren bat pairatu duten pertsonei arreta emozionala, presentziala, telefono bidezkoa eta laguntza emango diete. Bestalde, indarkeria matxistako egoeren aurrean herritarrak sentsibilizatze aldera, informazioa ere eskainiko diete bertara hurbildu gura duten pertsonei. “Horrela, pertsonak errespetatzen dituen eta emakumeen aurkako indarkeriarik gabeko jai-eredua bultzatzen jarraitzen dugu. Era berean, Jai Batzordeekin eta mugimendu feministarekin koordinazioan aurrera egiten jarraitzen dugu, gure jaiak espazio seguru bihurtzeko", nabarmendu du Carmen Diaz Gizarte Kohesioko zinegotziak.
Gunea barikuan, maiatzak 16, 23:00etatik zapatuko 05:00etara bitartean, kiroldegiko kanpoaldean izango da; eta maiatzaren 17an, Malakate parkean, 21:00etatik 23:30era, eta berriro kiroldegiaren kanpoaldean, gauerditik domekako 05:00etara.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
