Getxoko ondarea erakusten duen "Auzotarren mosaikoa" mural artistikoa aurkeztu dute

Estibaliz Maguregi 2025ko eka. 5a, 11:53

Areetako Ibaigane kaleko 3 eta 5 zenbakietako fatxadak hartzen duen Auzotarren mosaikoa horma-lana aurkeztu dute ofizialki. Atzo egin zuten, eta gaur-bihar artean bisita gidatuak egingo dituzte obra herritarrei gerturatzeko. Murala Giorgos Gkareth Christou eta Lisbeth Montoya Ramallo artistek egin dute, eta joan den otsailean hasi zituzten lanak. Arduradunek azaldu dutenez, proiektuaren helburua da plaza horretako elementu erreferenteak indartzea, eta, aldi berean, inguruko kokapen desberdinetako erreferentziak islatzea, hala nola Itzubaltzeta/Romoko Etxe Merkeak, eta Josemi Ibarretxe artista omentzea, Xakea obraren sortzailea, hainbat hamarkadatan fatxadan egon zena.

Proiektu hori aurrera eramateko, sormen-prozesu bat garatu dute, gerora obran islatu dituzten elementuak atzemateko, gero collage piktoriko gisa landu dituztenak. Espazio naturala, espazio arkitektonikoa eta zeru-espazioa berdintasunez uztartzen dira horma-pinturan.

Aurretiazko dokumentazio-prozesuan, teknika plastiko eta digitalen bidez esku hartutako 250 irudi baino gehiago bildu zituzten sortzaileek. Horietan, zuhaitz-loreen protagonismoa oso garrantzitsua da, baita beste hiri-elementu bizigabe eta lerro zuzeneko batzuk ere. Horrela, organikoaren eta geometrikoaren arteko erlazio dialektikoa planteatu gura dute, azken elementu hori xake-taula baten laukitxoen bidez nabarmenduz, "Ibarretxeren sorkuntzari omenaldi gisa", nabarmendu dutenez.

Sormen prozesua herritarrengana hurbiltzeko asmoz, sormen taldeak ekainaren 5ean eta 6an gauzatuko den bitartekaritza prozesu bat garatu du. Hala, bisitaldi gidatuak egingo dituzte, ibilaldi gisa planteatuak, eta, horietan, obra honen inspirazio iturri izan diren hainbat elementu erakutsiko dituzte: Santa Eugenia plaza inguruan, Ezequiel Aguirre kalean, Lope de Vega kalean, Nafarroan eta Cervantes plazan.

 

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun