"Amak esan zidan jende gutxi aurkeztu zela lehiaketara eta galdetu zidan ea nik nahi nuen, eta nik baietz", azaldu du gaztetxoak. Kontatu duenez, lehiaketa irabazi zuenean, oso pozik sentitu zen, baina aitortu du urduri ere jarri zela, "klasekoei ere esan nahi nielako".
"Kartelak atzeko aldean koloreetako bihotzak, borobilak eta laukiak ditu, eta erdian San Nikolaseko frontoia dago", adierazi du egileak. Hori sortzeko orduan, Ainhoa Ortells bere amak dioenez, "alde teknikoan" besterik ez diola lagundu, "baina oso gutxi, berak egin du gehiena".
Berari margotzea betidanik gustatu zaiola kontatu du, eta sen nahiko artistikoa duela ere aitortu du, baina berari balleta eta gitarra jotzea da gehien gustatzen zaizkionak. Hala ere, hurrengo urtean ere aurkezteko asmoa duela iragarri du.
Beste jaietako kartela aukeratzeko prozesuetan ez bezala, lehiaketa honetan ez dago adin-mugarik, beraz, edonork sortutako diseinuak suertatu daiteke aukeratua. Kasu honetan, Ortellsen diseinua izan da aukeratua eta jaiak iragartzeagaz batera, 300 euroko dirusaria ere jaso du. "Tableta apurtu zitzaidan, beraz, horretarako 200 euro jarri ditut, eta bestea nahi dudanean gastatzeko daukat", adierazi du.
Daborduko hasita dauden saninazio jaiei dagokienez, gaztetxoak azaldu du zezensuzkoa, bere adinekoentzako kontzertuak eta "lagunekin eta familiarekin egotea" diela gehien gustatzen zaizkionak. Gainera, Algortako jaietara hurbiltzen direnei "ondo pasatzeko" deia ere egin die.
