Ertzaintzak jakinarazi duenez, ustezko piromanoa abuztuaren 9an hasi zen suteak pizten, ibilgailuen aurreko gurpiletako bati su emanez. Hori izan zen ustezko gaizkilearen modus operandia kasu guztietan, suteetako batean izan ezik, edukiontzi baten ondoan koltxoi bat erre baitzuen.
Ertzaintzak eta Getxoko Udaltzaingoak egindako zaintzari esker, suteen ustezko egilea identifikatu eta atxilotzeko agindua eman zuten.
Eguazten gauerdian, Barakaldoko Udaltzaingoak gizon bat identifikatu zuen herriko denda batean ustez ebasketa bat egiteagatik, eta Getxoko suteengatik Ertzaintza bilatzen ari zen susmagarria zela egiaztatu zuen.
Ertzaintzak atxilotu egin zuen gizona, eta epailearen esku utziko du laster. Aldi berean, azken asteetan Getxoko hiri-altzarietan piztutako beste sute batzuekaz zerikusia ote duen ikertzen ari da.
