Gertakariak pasa den zapatutik domekara bitarteko goizaldean jazo ziren, abuztuaren 23tik 24rako goizaldean. Koordinazio Zentrora egindako dei batek jakinarazi zuen, 00:18an, ibilgailu bat sutan zegoela Arene kalean. Udaltzaingoaren patruila batek azkar esku hartu zuen, eta su-itzalgailu bategaz itzali zuen sutea. Bertan, sua azeleratzeko pilula batzuk aurkitu zituzten.
Ordu batzuk geroago, 04:33an, beste abisu bat jaso zen esanez Sarrikobaso kalean ibilgailu bat sutan zegoela. Suhiltzaile talde batek sua itzaltzea lortu zuen, baina ibilgailua erabat kiskalita geratu zen. Kasu horretan, Udaltzaingoari deitu zion pertsonak suteen ustezko egilearen janzkeraren deskribapen txiki bat eman zuen. Leku horretan aurkitutako frogengatik, badirudi sua produktu azeleratzaile bat erabiltzeagatik ere bizitu zela.
Egun bereko 05:45ean, Neguri etorbidean, beste pertsona batek edukiontzi bat sutan zegoela jakinarazi zuen, eta, berriz ere, suhiltzaileek itzali ahal izan zuten. Udaltzainek ustezko egilea aurkitu eta identifikatu zuten suteetako baten inguruan. Galtzetako poltsiko batean hiru metxero aurkitu zizkioten. Ertzaintzak eta Getxoko Udaltzaingoak joan den astean atxilotu zuten pertsona bera da. Abuztuan zazpi ibilgailu eta hainbat edukiontzi erretzea egotzi diote.
Polizia-eginbideak amaitu ondoren, atxilotua epailearen esku jarriko dute gaur goizean bertan.
