Talde ekologistaren arabera, dokumentuak "hamarnaka hektarea lur emankor” suntsiaraziko lituzke Getxon, eta horrek "herrian geratzen den nekazaritza ekoizpen apurra are gehiago murriztu" eta biodibertsitatean eragin zuzena izango luke. Horregatik, Udalari eskatu diote "atzera egin dezala" eta bestelako hiri-eredu bat eztabaidatzeko prozesua abiaraztea.
Jauzi Ekosozialak gogor salatu du planak planteatzen duen etxebizitza babestu kopurua; izan ere, euren hitzetan, "ahalik eta txikiena" delako. Horrek, "herri eredu elitista" baten alde egiten du, eta, ondorioz, gazteek edo baliabide gutxiago dituzten herritarrek zailtasun gehiago izango lituzkete etxebizitza eskuratzeko.
Horrez gainera, taldeak gogor kritikatu du Udalak herritarren ekarpenak baztertu izana, eta dokumentua "eraikuntza-enpresen interesei erantzuteko” diseinatu dela. Ildo horretan, salatu dute plan hau ez dela herritarrena, "espekulatzaileen diru-gosearen neurrira" egindakoa baizik.
Jauzi Ekosozialaren iritziz, eskualde osoak behar du bestelako planteamendu bat: espazio naturalen defentsa eta etxebizitzarako eskubidea oinarri izango dituen bat. Horregatik, Getxoko agintariei eskatu diete HAPO honetan egindako bidea ez baimentzeko eta "erronka ekosozialei aurre egingo liekeen plan berri bat" diseinatzeko.
