Hilabete bakar batean Bizkaibiziren 36.498 erabilera erregistratu dituzte Getxon, eta urteko metatuan ere lehen postuan kokatu da 464.086 joan-etorrigaz, metropolialdeko gainerako udalerrien gainetik. Hala, Bizkaia osoan gehien erabiltzen diren hamar geltokietatik zazpi berton daude; esaterako, Areeta eta Fadurako puntuek hilean 4.000 alokairu baino gehiago izaten dituzte, sistemako ezagunenak bihurtuz. Datu esanguratsu horiek direla eta, udalerriak sistemaren presiorik handiena pairatzen du, geltoki bakoitzeko batez beste 2.147 bidaia egiten baitira hilero. Egoera horri erantzuteko, Iparbide, Sarrikobaso eta Maidagan kaleetan geltoki berriak jartzeak egungo sarea arintzen lagunduko duela aurreikusi du Udalak.
Iñigo Urkitza Ingurumen zinegotziak azaldu duenez, geltoki berriek lurralde-estaldura hobetuko dute, kontuan hartuta Getxotik egiten diren joan-etorrien %72 udalerri barruan gertatzen direla. Inbertsio honegaz, Tokiko Gobernuak mugikortasun iraunkor, irisgarri eta konektatu baten aldeko apustua indartu gura duela ere berretsi du, herritarren benetako beharrei erantzunez.
