Epaiaren arabera, Getxoko Udalak egun berean onartu zituen 39.600 euroko kontratu bi, bakoitza, sektore publikoko kontratazioaren legeak ezarritako 40.000 euroko muga saihesteko. Kontratu biak Radimer enpresari esleitu zizkioten, eta helburua argiteria publikoa berritzea zen. Auzitegiaren arabera, ordea, "lan bakarra zen", udalerriko gune bitan gauzatu bazen ere.
EAEko Auzitegi Nagusiak berariaz azpimarratu duenez, "bi kontratuen artean batasun funtzionala dagoela egiaztatu behar dugu; izan ere, bietan argiteria publikoa berritzea zen helburua". Halaber, epaileek gaineratu dute "ez dela garrantzitsua lanak kilometro bat baino gehiagoko distantzian egin izana, funtsezkoa baita herriko argiztapena berritzeko jarduketa-plan bakar baten parte izatea, faseka gauzatu bada ere".
Lehen auzialdian, Bizkaiko Administrazioarekiko Auzien Aretoak ez zuen EH Bilduren salaketa onartu, baina EAEko Auzitegi Nagusiak epaia baliogabetu du, kontratuen zatiketa legez kontrakoa izan dela iritzita. Auzitegiaren ustez, lanak faseka izapidetu zitezkeen, "baina ez kontratuak zatituta, Sektore Publikoko Kontratuen Legearen 118. artikulua aplikatzeko".
Epaia testuinguru bereziki sentikorrean iritsi da, Getxoko Udalaren kudeaketa urbanistikoa eta administratiboa jomugan dauden unean. Izan ere, 'Irurak Bat' jauretxearen eraisketaren auziak hiru EAJko zinegotziren inputazioa ekarri du, eta horrek areagotu egin du udal gobernuaren jardunaren inguruko eztabaida politikoa.