Itaiako kideek adierazi zutenez, Getxon gertatutakoak "gurean ere sexu-esplotazioaren errealitatea zein gordina den" erakusten du. Era berean, gogorarazi zuten mundu osoan milioika emakume "egunerokoan sexualki esplotatuak eta bortizki zapalduak" direla, "zenbaiten irabazi ekonomikoak bermatzeko".
Itaiaren arabera, testuinguru ekonomiko eta sozial prekarioek emakume asko esplotazio-sareen menpe uzten dituzte, "baldintza penagarrietara kondenatuta". Halako egoerek "indarkeria matxista gordinean oinarritzen diren lan-prozesuetara kateatzen" dituztela salatu zuten, eta sare horiek, etekin ekonomiko handiak lortzeaz gain, "emakumeon sexualizazioan sakontzen" dutela ere gaineratu zuten, objektu sexualaren ideia indartuz.
Indarkeria matxistari aurre egiteko, "emakumeok prostituziora garamatzaten baldintza ekonomiko eta sozialak gainditzea" beharrezkotzat jo zuten, guztiontzako bizi baldintza duinak oinarri izango dituen gizartea eraikiz. Horretarako, "sexu-merkatuaren aurka borrokatzera eta haren konplize diren guztiei aurre egitera" deitu zuten, baita egoera horretan dauden emakumeekin batera antolatzera ere.
Azkenik, martxoaren 8ari begira mobilizatzeko gonbita luzatu zuten, eta aldarri argia plazaratu: "Sexu-esplotazioa borrokatu! Indarkeria matxista orori aurre egin!"
