AFAren esanetan, Eusko Jaurlaritzako Hezkuntza Saileko Ordezkaritzarekin izandako bilerak "porrot" egin du eta "kaos antolatzailea" zein "zorroztasun teknikoaren falta" izan ditu ezaugarri. Gainera, bileran ez omen dute jaso eskolaren itxiera justifikatuko lukeen txosten teknikorik edo memoria pedagogikorik: "Delegatua ez zen gai izan dokumentaziorik aurkezteko", adierazi dute.
Familiek azaldu dutenez, administrazioak "adingabeen ongizatea bermatzeko" argudioa erabili duen arren, idatzizko frogarik ez dute ikusi, eta emandako matrikulazio datuek, haien ustez, "integrazio proposamenaren bideragarritasuna zalantzan" jartzen dute. Horrez gain, Haur Hezkuntzari dagokionez, AFArentzat "lege-iruzurra" litzateke A ereduko ikasleak D ereduko geletan integratzea planteatzea, "aukeratzeko askatasunaren urraketa" eta "antolaketa-hondamendia" ekarriko lukeelakoan.
Bestalde, gela egonkorra ere jarri dute fokuan. Diotenez, Larrañazubik "inpaktu positibo handiko ingurune finkatua" eskaintzen du, eta, aldiz, administrazioak proposatutako lekualdaketan "oraindik existitzen ez diren instalazioak" edo "adabaki estrukturalak" aipatzen dituzte.
AFAren arabera, bilera akordiorik gabe amaitu zen eta "elkarrizketarako benetako borondaterik" ez zutela ikusi azpimarratu dute. Testuinguru horretan, familien elkarteak salatu du prozesuak "eskola publikoaren desmantelamendu programatua" erakusten duela, sare itunduaren kaltetan, eta iragarri du "bide guztiak" jorratzen jarraituko dutela Hezkuntza Sailak erabakia atzera bota arte.
