PPk azaldu duenez, proposamena San Nikolas plazako Telefonicaren eraikin zaharrean kokatzea da asmoa. Taldearen arabera, eraikin hori "egokia" litzateke udal-zerbitzu berria hartzeko, eta, gainera, HAPOaren bidez etorkizunean udal-ondarera pasatzeko aurreikuspena dagoela gogorarazi dute.
Ekimenaren oinarri gisa, PPk Barne Ministerioaren Memoriako 2025eko laugarren hiruhilekoko datuak aipatu ditu, 2024ko aldi beragaz alderatuta. Haien arabera, zigor-arloko arau-hausteak 551tik 617ra igo dira, hau da, % 11,98ko gorakada. Delitu-moten artean, PPk nabarmendu du lesio larriak eta borroka jendetsuak 6tik 8ra igo direla (% 33,33), etxebizitzetan indarrez egindako lapurretak 18tik 25era (% 38,89), eta lapurretak 106tik 129ra (% 21,70). Halaber, ibilgailuen lapurretak 3tik 5era igo direla adierazi dute (% 66,67), eta bereziki azpimarratu dute drogen trafikoagaz lotutako delituak 1etik 5era pasatu direla (% 400). Oro har, PPren arabera, kriminalitate konbentzionala 346tik 405era igo da, % 17,05 gehiago.
Eduardo Andrade PPko zinegotziak adierazi du datu horiek "goranzko joera" berresten dutela, eta neurri zehatzak behar direla: "Datu hauek goranzko joera berresten dute eta neurri zehatzak eskatzen dituzte. Poliziaren presentzia indartzea funtsezkoa da segurtasuna hobetzeko eta auzokideen kezka gero eta handiagoari erantzuteko", esan du. Komisaria auzoan bertan izatearen garrantzia ere azpimarratu du: "Auzoetan poliziaren presentzia handitzea, gertuko azpiegituren bidez, segurtasuna eta bizikidetza hobetzeko neurri eraginkorrenetako bat da".
PPk, horrenbestez, premiaz jarduteko beharra aldarrikatu du, eta osoko bilkuran gainerako alderdiei eskatu die ekimena babesteko, Algortan eta udalerriko gainerako auzoetan "gertutasunezko" segurtasun eredua indartzeko.
