Eguazten arrastian Leioan egindako agerraldian, plataformako ordezkariek azpiegitura "garesti eta antisoziala" dela adierazi dute. Hodei Rodriguez bozeramaileak ohartarazi duenez, proiektuak "garraio pribatuan oinarritutako mugikortasun eredua sustatuko du", eta horrek eragin zuzena izango du inguruneko bizilagunengan zein ikastetxeetan.
Bereziki kezkatuta agertu dira Artaza-Romo inguruko hezkuntza komunitatearekin. Plataformaren arabera, obrek zarata, bibrazioak eta kutsadura eragingo dituzte, eta horrek ikasleen eguneroko jarduna baldintzatuko du. "Ezinezkoa izango da klaseak normaltasunez ematea obren eraginarekin", azpimarratu du Rodriguezek.
Halaber, datorren ikasturteari begira dagoen ziurgabetasuna salatu dute. Lamiakoko ikastetxera lekualdatzeko proposamena "erabat bideraezina" dela uste dute, eta irtenbide egokirik ez dela planteatu kritikatu dute.
Itsasadarraren azpiko tunelaren proiektua 2015eko ekainean onartu zuen Bizkaiko Foru Aldundiak, 500 milioi eurotik gorako aurrekontuagaz. Egun, aurretiazko azterketen kontratazio fasean dago, 147 milioi euroko partidagaz. Hasiera batean lanak udaberrian hastekoak baziren ere, plataformak zalantzan jarri ditu epeak, eta atzerapenak egon daitezkeela iragarri du.
Testuinguru honetan, Subflubiala Ez! plataformak herritarren parte-hartzea funtsezkotzat jo du larunbateko mobilizazioan.
