Eguna eguerdiko 12:00etan hasi zuten emozioz beteriko ekitaldi bategaz. Hasierako aurreskuak eta txalapartaren doinuek harrera egin zieten Aldundiko, Udaleko eta elkarte laguntzaileetako ordezkariei, baita Zaporeaken funtsa diren boluntarioei ere. Goizean zehar, elkartearen lana islatzen zuten bideoak eta argazki erakusketak ikusi zituzten, txalapartariek giroa berotzen zuten bitartean.
Gastronomia, nola ez, jai herrikoiaren ardatz izan zen. Taloak, txistorra eta trikitilarien doinuak izan ziren goizaren erdigune, 13:30eko bertso-saioari bidea eman aurretik. Arratsaldean, herri-erromeriak jai-giroa gailurrera eraman zuen, eta 20:00etan eman zioten amaiera egunari, datorren urteko antolatzaileei lekukoa pasatuz.
Zaporeak elkarteko kideek poza eta esker ona adierazi dute jaialdiaren ostean: "Ze polita izan zen larunbatekoa! Gertu sentitu, partekatu, elkar besarkatu eta elkarregaz eraikitzen jarraitu dugu". Antolatzaileen esanetan, egun honek proiektu solidarioa "familia handi bat" dela berretsi du.
