Amnistiaren Aldeko eta Errepresioaren Aurkako Mugimenduak (AAEAM) jakinarazi duenez, Valence espetxe (Frantzia) barruko matxinada batean hainbat ziegei su eman zieten hainbat presok joan den domekan, tartean, Aletxu Zobaran gorliztarrarena. Halere, azaldu dutenez, bera ez zegoen han; izan ere, 51 egun daramatza zigor ziegan Ibon Goieaskoetxeagaz batera.
Iturriek jakinarazi dutenez, joan den domekan, hilaren 23an, hainbat preso matxinatu ziren Valenceko espetxean (Frantzia). Bertako espetxezainei giltzak kendu eta kartzelako solairu bi kontrolatu zituzten. Ondoren, hainbat ziega ireki eta haiei su eman zieten. Horietako bat Aletxu Zobaran preso gorliztarrarena da, eta AAEAMren arabera, haren ondasun guztiak erre dizkiote.
Azaldu dutenez, Zobaran eta Ibon Goieaskoetxea ez zeuden matxinadaren lekuan; izan ere, zigor ziegetan daude duela 51 egun, "senideen etxebizitzetatik urrundu izana eta Estatu frantsesa preso politikoen artean areagotzen ari den sakabanaketa salatzeko".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.