Aurten ere, Gorlizko Idazleen Elkarteak herriko jaietan parte hartuko du bere idazki poetikoen bidez. Hala, kideen obrak herriko merkataritza erakusleiho ezberdinetan egongo dira ikusgai, uztailaren 27an, Gorlizko Artisau Azokan. Gainera, egun horretan, euren lanen erakusketa eta salmenta ere egingo dute, prosan zein bertsotan idatzitako piezakaz. Euren xede nagusia da Gorlizko kultura sustatzea, betiere herriko eragileakaz elkarlanean.
Lucy Sepulveda Velasquez kideak azaldu duenez, ekimen honen ideia beste udalerri batzuetatik dator, eta elkarteko presidentea den Ana Blancok gainontzeko kideei proposatu zien jarduera. Hala, Goscoa Gorlizko Merkataritza, Ostalaritza eta Zerbitzuen Elkarteko presidenteagaz harremanetan jarri ziren, eta Susana Gil lehendakariak "ilusio handiz" eman zien baimena. Modu horretan, herriko denden erakusleihoetan euren obrak erakusteko aukera dute aurten ere. Euren helburu nagusia da ekintza hauen bidez herria kulturalki erakargarriago bilakatzea, bai herritarrentzako bai udatiarrentzako.
Halaber, elkarteko kideek aurtengo Dastatuarte Food&Art 2024 jaialdian ere partu hartu dute, Gorlizko erakusleihoak euren poesiez apainduz.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
