Gorliz Bizirikek adierazi du udal bilkurak "normaltasunez" ospatu dituztela, eta azken aparteko udal bilkura abenduan izan zela. Ordea, urtarrileko udal bilkura ezin izan zuten ospatu idazkari berria izendatu behar zutelako; martxoaren 13an egin zuten lan hori. Hala, hurrengo udal bilkura martxoaren 27rako iragarri dute eta apirileko lehenengo hamabostaldirako beste aparteko udal bilkura bat aurreikusita dutela baieztatu dute.
Halaber, seinalatu dute udalean geldiari instituzionala egotea "erabat faltsua" dela: "Hondartzako txiringitoen tramitazioa baita jubilatuen etxearen lizitazioa joan den martxoan 7an jarri ziren martxan". Gainera, TAO ordenantza berriaren tramitazioari dagokionez, deitoratu dute aurreko otsailaren 4an bai EH Bilduk bai EAJak euren proposamena jaso zutela eta gaur egun arte ez dutela erantzunik jaso.
Ildo berean, Gorliz Bizirikek adierazi du EH Bilduk jornada erdian liberatutako pertsona bat duela, gai guztiak ezagutu eta jarraipena egiteko, "nahiz eta hura udaletxetik ikustea arraro xamarra den".
Aurrekontuetan onartutako lizentzia eta proiektuei dagokionez, hainbat traba eta arazo topatu dituztela nabarmendu dute herria hobetzeko ekimenak aurrera eramateko. "Hilabete horietan Gorliz Bizirikek bakar-bakarrik eta korrontearen kontra arraun egin du. EH Bilduk ez du ezer egin konponbideak bilatzen laguntzeko", azpimarratu du.
Gainera, kalte psikosozialak ebaluatzeko protokolo bat ireki dutela adierazi dute lanean minduta sentitu diren Udaleko langileei laguntzeko. Hala, nabarmendu dute indartsu sentitzen direla eta legegintzaldiagaz jarraitzeko ilusio berriagaz daudela: "Gorlizko Udalean ez dago kolapsorik, baina alderdi batek Alkatetza lortu nahi duela dirudi, hautetsontziek horretarako ahalmena eman aurretik".
Bukatzeko, autokritika egiteko ariketa egin dute ere eta herritarrei barkamena eskatu diete batzuetan ez direlako gai izan kudeaketen bilakaerari buruzko informazioa garaiz emateko. Hala ere, herriarentzat eta herritarrentzat lan egiteko konpromisoa berretsi dute.
View this post on Instagram
