Santiago jaiak amaitzeagaz batera, Gorlizko hainbat eragilek —Sorginen Alabak, Gorlizko Udalak, Kandelaria Kultur Elkarteak, Los Urris taldeak, Gorlizko kuadrillak, Ugarisub eta Uribe Kosta Saskibaloi Klubak— adierazpen bateratua argitaratu dute, azken egunotan Gorlizko jai-gunean izandako eraso matxistak eta borrokak salatzeko.
"Aurten hainbat eraso matxistaren eta borroken berri izan dugu eta horrexegatik, erantzun sendo eta bateratua emateko erabakia hartu dugu", azaldu dute hasieran. Eragileek argi utzi gura izan dute halako gertaerak "onartezinak" direla eta ez direla inolaz ere normalizatu behar. "Eraso bakoitzak dagokion erantzuna izango duela" berretsi dute, eta, batez ere, "erasotuei babes osoa" adierazi gura izan diete.
Gaineratu dutenez, mugimendu feministak urteak daramatza protokoloak berritzen eta erasoen aurrean erantzunak ematen, baina "ez da nahikoa", ohartarazi dute. Testuan azpimarratu dutenez, "ez dugu inolako erasorik onartuko, ezta erasotzaileak zein bere kuadrillak berriz ere erasotzen gaituztenean ere".
Horregaz batera, erasotzaileen konplize diren jarrera pasiboak ere salatu dituzte: "Zure laguna mobida bila dabilela ikusita, ez baduzu ezer egiten hori ekiditeko, ez zara ongi etorria txosna-gunean", argi eta garbi adierazi dute.
Bestalde, jai-giroa nahastu duten borroken inguruan ere hartu dute hitza, gizon batzuek sortutako liskarrek jaiaren osasuna "zikindu" dutela salatzeko. "Indarkeria ez da ongi etorria txosna-gunean, edozein forma duela ere", esan dute.
Azkenik, adierazpenaren amaieran nabarmendu dute lanean jarraituko dutela, "denontzako gozagarri izango den jai-giroa" lortzeko. Horregaz batera, ohartarazi dute: "Gorlizko jai giroa feminista izango da ala ez da izango! Ez badakizu egoten, ez etorri!".
Herritarren parte-hartzea eta ardura kolektiboa ezinbestekotzat jo dute jaietan espazio segurua bermatzeko. Eragileek adierazi duten moduan: "Denon ardura da jaiak diren espazio kolektibo hau zaintzea eta denontzat gozagarriak izatea bermatzea".