Joan den maiatzaren 25ean, Eusko Jaurlaritzako Lurralde Plangintza, Etxebizitza eta Garraio Sailak EAEko eremu tentsionatuei buruzko txosten bat argitaratu zuen, eta Gorliz izendapen hori eskuratu dezaketen udalerrien artean kokatu zuen. 12/2023 legeak, etxebizitza eskubidearen aldekoak, udalerri bat eremu tentsionatu izendatzeko bete behar diren irizpideak ezartzen ditu, eta horietako bat gutxienez betetzea nahikoa dela dio.
Gorlizen kasuan, agerikoa da azken bost urteetan salerosketa prezioak izan duen igoera, altuenen artean kokatzen baita, % 23,6 igoeragaz. Hori dela eta, Gorliz bere osotasunean tenkatutako eremu izendatu daitekeen udalerrietako bat da.
Prozedura
Eremu tentsionatu bat izendatzeko, zenbait fase dituen prozedura bati jarraitu behar zaiola azaldu dute Gorlizko Udaleko iturriek. Gaur egun, Gorliz hasierako etapan kokatzen da, informazio bilketan zentratuta, udalerriko etxebizitzaren egoeraren azterketa egiteko, justifikazio-memoria bategaz batera.
Ondoren, ekintza-plan bat diseinatuko dutela zehaztu dute, bere estrategia eta jarduera-ildoakaz, merkatu orekatuagoa eta eskuragarriagoa lortzeko. Azpimarratu dutenez, garrantzitsua da kontuan hartzea neurri honen helburua ez dela alokairuaren prezioak errotik jaistea, baizik eta errentarien eta jabeen interesak babestea.
Azkenik, dokumentazio guztia osatuta, Udalak Eusko Jaurlaritzari eskatu ahal izango dio tenkatutako eremu izendatzea, eta neurri horrek aukera berriak emango dizkio Udalari egungo egoera arintzeko. Horrez gain, alokairu-prezioak arautzeko, etxebizitza babestuetan inbertsio handiagoa egiteko edo etxebizitzaren arloko zenbait diru-laguntza eskuratzeko aukera ere emango dio.
