Hainbat izan dira bertoko gazte feministek bildutako kexak; besteak beste, egungo egoera bereziki larritzen die. Izan ere, erasotzailea postu berera itzuliko dela salatzen dute eta errua Udalari leporatu diote, konplize dela esanez: "Zerbitzutik bota zezakeen, baina ez zuen egin".
Egoera dela medio, Plentzia/Gorlizko talde feministak elkarretaratzea deitu du gaur, abenduak 4, Gorlizko udaletxean. Kontzentrazio deialdia arrastiko 18:30ean izango da.
Gazteek berdintasun plan bat martxan jartzea, langileentzako prestakuntza feminista eta eraso matxisten aurrean protokolo argiak ezartzea eskatzen dute, besteak beste. Helburu horiek lortzeko, datorren osoko bilkuran euren proposamenak aurkeztuko dituzte. Era berean, Gorlizko Udalari eskaera zuzena egin diote: "Udalak ezin du ezikusiarena egin, bere ardura da langileen eta herritarren segurtasuna bermatzea".
