Udalaren lehentasunetako bat oinezko, txirrindulari eta ibilgailuen arteko elkarbizitza seguru eta iraunkorra bermatzea dela azpimarratu du Ekaitz Pau Gorlizko alkateak. Horretarako, besteak beste, gutxienez 2 metroko zabalera duen espaloia bermatu dute ibilbide osoan zehar, eta zabaldu ere egin dute, zenbait puntutan, oinezkoek zein mugikortasun-arazoak dituzten pertsonek segurtasun osoz paseatzeko aukera izan dezaten.
Era berean, jarduera hau Udalak mugikortasun aktibo eta osasungarriaren alde egindako apustuaren barruan kokatu du alkateak. Ildo horretan, joan den ekainean, Udalak bizikletentzako aparkaleku segurua ere jarri zuen martxan: Bizipark. Hala, udalerrian garraio jasangarria sustatzeko azpiegiturak handitzen jarraitzen dutela ere nabarmendu du.
"Gure herrian mugitzeko ohiturak eraldatu nahi dugu, kotxearekiko mendekotasuna murriztu eta eredu osasungarriago, eskuragarriago eta gure ingurunearekiko errespetuzkoago baterantz aurrera egin", adierazi
du Pauk.
Estudios y Obras Rekalde enpresak egin du obra, eta 195.230,34 euroko aurrekontua izan du. Gainera, Next Generation Europako Funtsakaz (134.600 euro) finantzatu da hobekuntza, Jata Ondo Landa Garapenerako Elkartearen bidez.
