Aurtengo edizioan, gastronomiak eta kaleko giroak protagonismo handia izan dute, artisau-produktuen azokagaz, foodtruckakaz eta dastaketa zein ekintza gastronomiko askotarikoakaz. Horrez gainera, Gorlizko Idazleen Elkarteak erakusleihoak poesiagaz janzteko ekimena egin du, herriko hainbat saltokiren laguntzagaz; horrela, merkataritza-guneak ere jaialdiaren parte bihurtu dira.
Pintxo Lehiaketari dagokionez, Urtero legez, Dastartuartek alde solidarioa ere izan du Adela EH fundazioaren alde egindako paella erraldoiagaz. © GORLIZKO UDALATxispas Tabernak eskuratu du lehen saria, pintxo originalenaren eta aurkezpen zein zapore onenaren aitortza jasota. Bigarren postua Argintxe Tabernarentzat izan da, eta hirugarrena Jamonostruckentzat. Gainera, 300 eurotan baloratutako saski gastronomikoaren irabazlea Alejandro Miralles izan da.
Dastatuartek, aurten ere, elkartasunerako tartea izan du. Ohiko paella solidarioa Adela EH fundazioaren alde egin dute, Alboko Esklerosi Amiotrofikoa duten pertsonak eta haien familiak babesteko lan egiten duen erakundearentzat. Ekimen horrek jaialdiaren izaera komunitarioa indartu du, gastronomia eta gizarte-konpromisoa uztartuta.
Antolatzaileek nabarmendu dute Dastatuartek herria aire zabaleko agertoki bihurtu duela, bertako zein kanpotik etorritako familientzat aisialdirako eta kulturaz gozatzeko aukera eskainita. Jaialdiak, horrela, Gorlizen gero eta errotuago dagoen hitzordua dela berretsi du, arte-adierazpenak, sukaldaritza eta herritarren parte-hartzea elkarren osagarri bihurtuta.
