Plentziako kirol-portuko amarraduren gatazkak ez du, oraingoz, irtenbiderik. Euskadiko Kirol Portuak (EKP) erakundeko zuzendari Jon Asuak Eusko Legebiltzarrean aitortu duenez, epaitegien erantzunaren zain daude 2021ean esleitutako 204 amarradurekin zer egin erabakitzeko. "Eskuak eta oinak lotuta" dituztela adierazi du Asuak.

Gorlizko adinekoek euren egunerokoan aurkitzen dituzten zailtasunak eta herrian egin daitezkeen hobekuntzak zuzenean helarazteko aukera izango dute. Udalak Gorliz Lagunkoia proiektua jarriko du martxan, eta aldizkako bilerak egingo ditu herriko nagusiakaz, besteak beste, irisgarritasunaz, mugikortasunaz, udal-zerbitzuez eta komunikazioaz berba egiteko.