Azkenengo bi urtetan, hain zuzen ere, Bizkaiko Batzar Nagusietan, Gizartekintza Mahaiak bultzatuta, alderdi politikoek, sindikatuek, eta erakunde ezberdinetako ordezkariek (Emakunde, Ertzaintza, Auzitegi Nagusia, Osakidetza, Hezkuntza saila … eta abar luze bat) lan egin dute “Emakumeenganako Tratu Txarrei buruzko Txostena” egiteko.
Lan hau amaitu ondoren bi ondorio nagusi atera dituzte: batetik, emakumezkoen aurkako indarkeriaren edo genero indarkeriaren arrazoia eta susterra emakumezkoek gure gizartean oraindik ere jasaten duten ezberdintasun estrukturalean datza eta, bestetik, nahiz eta gizarteak berak eta erakundeek arazo honen aurrean eman duten erantzuna baloragarria izan, ez da nahikoa. Horrexegatik, beste neurri batzuen artean, proposatu zuten “Genero-indarkeriarako Behategia” sortzea.
Esan eta izan. Organu berri hori errealitatea izango da datozen hilabetetan Bizkaiko Foru Aldundiak hurrengo urterako aurrekontuetan partida berezia ezarri baitu “Genero-indarkeriarako Behategia” martxan jartzeko. Organu honen betebeharra informazio eta datu guztiak biltzea izango da, eta arazo honen norainokotasuna, alde guztietatik ikusita, zein den erakusteko balio izango du. Behategi horretan erakunde guztiek, handienetik txikienera eta emakume-elkarteek ere hartuko dute parte.
Bizkaian hasi gara bidea egiten. Saia gaitezen guztion elkarlanarekin era guztietako indarkeria gure aldamenetik baztertzen. Horrela gizarte osasuntsuagoa eta justuagoa utziko diegu gure seme-alabei.
Zoritxarrez, eguneroko berriak dira emakumezko askok jasaten dituzten tratu txarrak eta era askotako erasoak.Egun hauetan indarkeria honen aurka Nazioarteko Eguna izan dela eta, datuak eta aldarrikapenak entzun dira edonon eta hedabide guztiek horren oihartzuna jaso dute.Ondo da egoera salagarri horiek ezagutzera ematea gizarte osoa kontura dadin arazoak gure etxe ondoan daudela, eta ona da, halaber, arazo honi aurre egiteko erakunde eta emakumezkoen elkarte askok egiten duten lan goraipagarria ezagutaraztea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun