Politika eta osasuna - Antton Azkargorta / EHUtik kaleratutako irakaslea

Erabiltzailearen aurpegia
José Luis Sampedro idazle bartzelonarrak Espainiako gobernuburua kritikatu du oraintsu egindako elkarrizketan. Aznarrek, Nazio Batuetako idazkari nagusiaren aurrean eta ‘terrorismoaz’ ari zela, “kausak ez dutela garrantzirik eta ondorioekin amaitu behar dela” esan zuen. Sampedrok hori astakeria galanta dela esan eta honakoa gehitu du: hori onkologoei minbizia nola sortzen den iker ez dezatela eskatzea bezala da.
Esan nahi duena ulertzen diodan arren, Sampedrok ez du —nire ustez— konparazioan asmatu. Hain zuzen ere, gaur egun onkologo gehienak eritasunaren ondorioez arduratzen dira eta ez haren zergatiez. ‘Terrorismoaren’ aurkako borrokak ‘terrorismo’ gehiago baino sortzen ez duen modu berean, minbiziaren kontrako lehia modernoak —mutilatzen duen ‘bonbardaketa’ kirurgikoan, pozoitzen duen ‘bonbardaketa’ kimioterapikoan, eta erretzen duen ‘bonbardaketa’ erradiaktiboan oinarrituak— minbizia hedatu eta gaixoak hil baino ez ditu egiten. Gero eta ikerlari gehiagok pentsatzen du gaixotasunaren ondorioak arintzeko erabiltzen diren sendabide horiek kasu batzuetan minbizi gehiago sortu eta askotan gaixoaren sistema inmunologikoa erabat erraustuta utzi ondoren, edozein infekziori (bronkitisa, neumonia…) bidea libre uzten diotela, horrela eritasunaren efektu hilkorrak biderkatuz.

‘Terrorismoaren’ aurkako borrokaren onuradunak armak fabrikatzen dituzten multinazionalak, industria kimikoak eta azpiegitura-eraikitzaileak diren moduan, gaixotasunaren kontrako gerra deklaratuan industria botikaria eta haren zerbitzura dauden mediku funtzionarioak dira onuraren hartzaile nagusiak.

Politikaren eremuan gatazka armatuak gainditzeko neurri alternatiboak proposatzen dira: herrien zein pertsonen eskubideen onarpena, kausen ezagutza, elkarrizketa eta negoziazioa. Horiek dira egiazko bide prebentiboak. Minbizia ikertzen duen institutu ospetsu baten zuzendariak, Mariano Barbacid-ek, orain arte erabiltzen diren metodoek “goia jo dutela” esan berri du, eta arrazoia duela uste dut. Alabaina, horien ordez “geneak bonbardatzea” proposatu du.

Uste dut ordua dela ‘bonbardaketa’ horiek guztiak alde batera uzteko, eta gizakia zer den eta gaixotasunaren zergatiak ulertzen saiatzeko. Gizakiak bere osasunaren axola hartu behar du bai prebentzioan eta bai sendatze prozesuan: elikadura eta bizimoduaz arduratuz, batez ere, bide alternatiboen bila ari diren mediku eta espezialisten laguntzarekin, noski. Finean, “Gerrari ez” leloaren barruan, hain ikusgarriak ez diren baina haiek bezain hilgarriak diren beste gerrak ere sartu beharko genituzke; osasunaren aurkakoa, adibidez.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun