Gabon-kanta kontzertua emango du bihar Erromon Ondarreta Abesbatzak

Erabiltzailearen aurpegia
Ondarreta Abesbatzak gabon-kanta tradizionalak eta beste ezezagunago batzuk bilduko dituen kontzertu bat emango du bihar, Erromoko San Jose elizan, arratsaldeko 20:15etik aurrera. Sarrera dohainik izango da, Getxoko Kultur Etxeak jakinarazi duenez.
Betiko gabon-kantak eta ezezagunago batzuk interpretatzeaz gainera, abesbatza getxotarrak euskal gabon-kantak ere berreskuratuko ditu, euskarazko pieza hauek bultzatzeko asmoz.

Egitarauari dagokionez, sopranoak, tenoreak eta errezitatzaileak Ganbera Orkestra gaztearekin eta xirula, biolontxelo, organo edo pianorako soloekin batera arituko dira. Horrela, 'Noche de Paz' edota 'Birjina Maite' bezalako klasikoak, melodia gregoriar, txiletar edo venezuelarrekin batera entzun ahal izango dira.

Ondarreta Abesbatza izan da ekimenaren egilea. Talde getxotarrak 1967an ekin zion bere ibilbideari, Areetako Mesedeetako Amaren elizako abesbatza bezala, baina sei urte geroago hartu zuen egun duen koru itxura. Ordutik, mota guztietako generoak bildu ditu bere errepertorioan, hala nola obra sinfonikoak, operak edota zarzuelak. Euskal Herrian eskainitako kontzertuez gain, Espainian, Frantzian, Alemanian edota Belgikan ere aritu da.

1977. urtetik Manuel Torreo Lledó da abesbatzaren zuzendaria. Torre Lledó-k Donostiako Ganbera Orkestra eta Bilboko Orkestra Sinfonikoko Ganbera Orkestra zuzendu ditu. Gainera, zenbait opera, zarzuela eta obra koralak prestatu ditu, zuzendari ospetsuekin kolaboratuz.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun