Etxezuriko babes ofizialeko 32 etxebizitza zozketatu dira gaur

Erabiltzailearen aurpegia
Getxoko Udalak gaur eguerdian zozketatu ditu, Andra Mariko pilotalekuan, Etxezuri eremuan eraikitzen ari diren babes ofizialeko 32 etxebizitza.

Etxebizitzaren bat eskuratu nahian, 700 lagun hurbildu dira bertara, eta zozketan izan dira, besteak beste, Iñaki Zarraoa alkatea, Iñaki Urkiza, Etxebizitza eta Gizarte Gaietarako zinegotzia, eta Jose Manuel Etxebarria, Kontuhartze eta Kontratazio zinegotzia.
Getxoko Udalak zozketatzen dituen babes ofizialeko lehenengo etxebizitzak direla azpimarratu nahi izan du Iñaki Zarraoa alkateak. Bertan zeudenei gogoratu nahi izan die eraikitze-lanak oso aurreratuta daudela eta datorren urteko otsailerako prest egongo direla etxeak bertan bizitzeko. Iñaki Urkiza Etxebizitza zinegotziak, berriz, getxotar guztiek etxebizitza izateko eskubidearen alde lanean jarraituko dutela adierazi du.

Eusko Jaurlaritzak esleitutako etxebizitzekin gertatu ez zen bezala, gaur, banan-banan egin dute zozketa, hau da, zenbakiz zenbaki. Orduan, zenbaki bakarra atera zuten, eta hortik aurrera erabaki ziren hurrengoak zeintzuk izango ziren. Frontoian bildutakoek ontzat jo dute gaurko modua.

Zozketatu dituzten Etxezuriko 32 etxebizitzak, 52 eta 79 metro kuadro bitartekoak dira, eta gela bakarra edo bi dituzte. 50 urteko kontzesioaren erregimenean esleitu dituzte.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun