Ostiralean konzentrazioa egingo dute Erandioko udal egoitzako langileek

Erabiltzailearen aurpegia
Urtarrilaren 16an protesta-ekitaldia egingo dute, Erandioko Udaletxeko Plazan, San Jose udal egoitzako langileek. Horietatik hamaika greba mugagabean daude, abenduaren 31tik, lan-baldintza hobeagoak eskatzeko. ELA sindikatuko iturriek adierazi dutenez, garbiketa, harrera eta "office" zerbitzuetan egiten ari dira lanuzteak. Adinekoak zaintzeaz arduratzen diren erizainak, aldiz, normaltasun osoz dihardute lanean.

Erandioko Udalak azkeneko hauen lan-baldintzak hobetzea erabaki zuenean sortu zen gatazka, langile guztiak lan-hitzarmen berberapean egon arren. Denak dira Garbialdi SAL enpresakoak.
"Erizainen egoera sektore publikoko lan-baldintzekin parekatu dituzte. Garbiketa langileekin, aldiz, gauza bera egiteari uko egiten diote. Hileroko 500 eurotik gorako ezberdintasuna dago sektore publikoan funtzio berdinak egiten dituzten langileekiko", salatu du ELAk.

San Jose udal egoitzako hamaika langileenganako "mesprezua eta bereizkeria" kritikatu ditu sindikatuak, eta Erandioko Udala eta Garbialdi SAL enpresa egin ditu egoeraren erantzule. Horrela, datorren ostiralerako, konzentrazio bat deitua dagoela jakinarazi du. 11:00etatik 12:00etara egingo da Erandioko Udaletxeko Plazan.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun