Besteak beste, Bartzelonan izandako manifestazio jendetsuan, jendea oihuka hasi zitzaien Josep Pique Kataluinako PPko burua eta Rodrigo Rato Espainiako presidenteordeari eta pankarta zeramaten Kataluniako agintariak baino atzerago jarri behar izan ziren. Manifestazioa bukatu aurretik atera egin zituzten poliziaz inguraturik. «Gezurtiak, hiltzaileak eta kanpora» oihukatu zieten etengabe. Besteak beste, Pasqual Maragall Generalitateko presidenteak, Josep Lluis Carod-Rovira ERCko idazkari nagusiak, eta Ernest Benach Kataluinako Parlamentuko presidenteak zeramaten "Terrorismoaren aurka, Katalunia Madrilgo biktimekin, Demokrazia eta Konstituzioarekin alde" lelo ofizialaz gain, beste askok jendearen haserrea irudikatu zuen: Aznar, Bush eta Blair errudunak; Gerrarik ez; Informaziorako eskubidea, ez itsuak, ez gogorrak; Terrorismoa ez, Aznar ez; edota Hau gertatzen zaigu gobernu fatxa bat izateagatik.
Ehunka milaka lagun batu zituen Madrilgo manifestazioan, berriz, ibilbidean zeuden manifestari askok eta askok Jose Maria Aznar Espainiako presidentea pasatzen ikusten zutenean, "Zein izan da? Egia jakin nahi dugu terrorismoari buruz" oihukatzen zioten behin eta berriro. Deiadar hori izan zen gehien entzun zena Madrilgo karriketako elkarretaratzean. Baina builak ez ziren horretan gelditu eta tentsio uneak ere egon ziren, Gobernua gezurti zioen kartela atera zuenean manifestari batek. Jendea erasoka hasi zitzaion, beste batzuk lasaitasun eske aritu ziren bitartean.
Euskal Herriko hiriburuetan egindako elkarretaratzeetan "egia jakiteko eskubidea" aldarrikatu zuen jendeak eta politikariek. Horietako batzuetan tentsio uneak bizi izan ziren. Besteak beste, Bilbokoan, banaketa argia somatu zen gerraren eta terrorismoaren aurkako oihuen artean. Iruñean espainiar banderak zeramatzaten gazte ultraeskuindarrek hainbat lagun iraindu eta mehatxatu zituzten.
Madrilgo atentatuak gaitzesteko Espainiako Gobernuak deitutako elkarretaratzeak hasi baino apurtxo bat lehenago ezagutu ziren ETA erakundearen adierazpenak, horrek PPren, Madrilgo Gobernuaren eta Irakeko gerraren aurkako oihuak eta erantzukizun eskaerak eragin zituen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun